Merkezê Xeberan- Morales nêmeyê şewe de bi teyaraya leşkerî şi Meksîka. Meksîka heqê multecîtîye da Moralesî.
Moralesî dişeme saete 21:30 de twîtterî ser o mesajêk erşawit û vat: "Way û birayênê, ez şina Meksîka. Seba mi giran o ke semedê sîyasî ra welat ca biverda labelê ez do hişyar biba. Ez do bihêz û enerjîyêkê xurtêr abigêra."
Wezîrê Karanê Teberî yê Meksîka Marcelo Ebrardî nêmeyê şewe de twîtterî ser o pare kerd ke Morales teyaraya leşkerî ya Meksîka de yo û fotografo ke destê ey de alaya Meksîka bî pare kerd. Moralesî ard ziwan ke verî ke şoro Meksîka keyeyê ey ame talankerdene û kesan waşt ke keyeyê ci biveşnê.
Evo Moralesî çalakîyanê şermezarkerdişî ra dima yewşeme de îstîfa kerd. Moralesî 20ê teşrîna verêne de weçînayîşê serekatîye de serkewtişê xo pare kerdibi labelê muxalefetî vatibi ke weçînayîşî de hîle ame kerdene. Moraleso ke serra 2006î ra nat îqtîdarî de bi vatibi: "Ez wezîfeyê xo ra fek vera dana." Nê îstîfa ra ver zaf wezîr û parlamenteran zî îstîfa kerdibî.