Hunermendê ji Dêrsimê Mîkaîl Aslan ragihand ku ji ber qerebalixiya bernameyê û guherînên di organîzasyonê de, ew dê konsera xwe ya li Amedê li derve pêk bîne.
Hat eşkerekirin ku dê ev konser ji bo xelkê bê pere be.
Mîkaîl Aslan da zanîn ku destpêkê dema konserê wekî 15ê Gulanê li Navenda Çandê ya Sezai Karakoç a Amedê hatibû plankirin lê ji ber çalakiyên Cejna Zimanê Kurdî yên di heman rojê de, dema konserê guherî ye.
Mîkaîl Aslan li ser pêvajoya organîzasyonê daxuyaniyek da.
Wî diyar kir ku ji ber hinek astengiyan, ji wan re hatiye gotin ku ew çalakiyên ku di çarçoveya Cejna Zimanê Kurdî de hatibûn plankirin pêk nayên.
Konsera li derve û bê pere
Mîkaîl Aslan di daxuyaniya xwe de wiha got:
“Ji ber van pêvajoyên bipaşxistin û betalkirinê em li hemberî gel û guhdarên xwe yên hêja gelekî mehcup bûne û em lêborîna xwe dixwazin.”
Mîkaîl Aslan destnîşan kir ku ew dixwazin vê pêvajoya qewimî telafî bikin û ragihand ku ew dê konserê wekî konsereke gel a belaş li dar bixin.
Mîkaîl Aslan li ser cih û dema konserê ev agahî dan:
“Ji bo ku em vê neyîniyê piçekî jî be telafî bikin, me biryar daye em konsera xwe ji her kesî re vekirî û wekî konsereke gel a bê pere li dar bixin.
Kesên ku berê ji bo konserê bilêt kirîne, dê pereyên wan ji wan re were vegerandin.
Bi hêviya ku em 1ê Hezîranê demjimêr 20:00an li Qada Şêx Seîd li derve werin ba hev.”