Lijneya Ewlekariya Tirkiyê (MGK) civiya û piştî civînê hat ragihandin ku operasyonên wan ê li ser xaka Herêma Kurdistanrê wê bê navber berdewam bikin.
MGK bi serokatiya Serokomarê Tirkiyê Recep Tayyip Erdogan û beşdariya hejmarek wezîr, fermandar, Serokê MITê û Endamên Desteya Şuraya Leşkerî li Enqere civiya.
Hat ragihandin ku yek ji mijara sereke ya civînê operasyonên leşkerî yên li derveyî sînor bû û biryar hat dayîn operasyon berdewam bikin.
Piştî civîna ku 5 saetan dom kir, bi daxuyaniyeke nivîskî hat ragihandin, operasyonên derveyî sînor yên artêşê bi rêzgirtina serwerî û yekrêziya axa welatên cîran wê bênavber berdewam bikin.
Di daxuyaniyê de li ser armanca operasyonê jî hat îdiakirin ku ew operasyon li gel ewlehiya Tirkiyê ji bo avakirina ewlehî û aramiya welatên cîran têne kirin.
Hêjayî gotinê ye, ji ber operasyon û bombebaranên Tirkiyê yên li Herêma Kurdistanê ku bi hinceta PKKê pêk tîne, ziyaneke mezin a madî gihîştiye xelkê Herêma Kurdistanê û hejmarek zêde gund jî vala bûne.