Weqfa Tarîx û Kulturî ya Dêrsimî seba ronayîşê xo muracatê mehkeme kerd. La mehkeme bi bahaneya ke 'Dêrsim' nameyêko fermî nîyo û paştdayîşê bi xebetanê tarîxê elewîtî û Dêrsimî vera yewîya 'mîllî' yo waştiş red kerd.
Weqfa Tarîx û Kulturî ya Dêrsimî seba ronayîşê xo serrêke verî muracatê mehkeme kerdbi. Weqfe bi eşkerayîyêke da zanayene ke mehkeme waştişê ronayîşî red kerd. Goreyê eşkerayîye bi bahaneya ke nameyê 'Dêrsimî' fermî nîyo û xebatê qeydkerdişê beyt, rîtuel, dûayanê elewetîye û tarîxê Dêrsimî vera yewîya 'mîllî' yê û coka nênê paştîdayene mehkeme muracat red kerd.
Weqfe vera redî nêrazîbîyayîşê xo mojna û ard ziwan ke na bire demokratîk û edîle nîya. Eşkerayîye de ame parekerdene ke ê wazenê yew 'merkezê vîrî' abikerê û eşkerakerdişê tarîxî sûc nîyo.
Weqfe da zanayene ke bi na bira redî elewî û Terteleyê Dêrsimî yenê sûcdarkerdene, înkarkerdene. Weqfe venga dêrsimij, elewî, hêzanê demokrasî da ke vera mesele bêveng nêmanê û rûmetê merdimîye bipawê.