Mehkemeya Îdareyî ya Anqara Wezîrîya Karanê Zereyî ra waşt ke mîyanê 30 rojan de derheqê cayê gorê Şêx Seîd û embazanê ci de pêro belge û agahîyan bierşawa.
Baroyê Amedî, Komeleya Perwerde, Kultur û Paştdayîşî ya Şêx Seîd û wasîyê Şêx Seîdî Kasim Firatî seba eşkerakerdişê cayê gorê Şêx Seîd û 46 embazanê ci yê ke 1925 de ameybî daliqnayene, 15ê sibate de muracatê Wezîrîya Karanê Zereyî kerdbi. La wezîtîye wextê xo de cewab nêdabî muracatî. Naye ra dima 15ê nîsane de înan muracatê Mehkemeya Îdareyî ya Anqara kerdbi.
Mehkemeya Îdareyî ya Anqara 28ê nîsane de derheqê muracatî de Wezîrîya Karanê Zereyî ra pawitiş waşt û waşt ke mîyanê 30 rojan de belge û agahîyê nê warî mehkeme rê bêrê erşawitene.
Endamê Heyetê Rayberdişî yê Baroyê Amedî, avûkat Mehdî Ozdemîrî muracat ercna. Ozdemîrî vist vîrî ke Wezîrîya Karanê Zereyî cewab nêdayo muracatî û vat: ''Goreyê qanûnan ganî 30 rojan de cewab biameyêne dayene. Mehkemeya Îdareyî ya Anqara muracatê ma qebul kerd û Wezîrîye ra belge û agahîyî waştî. Eke ma rê rayîrê huqûqê zereyî bêrê qefilnayene ma do muracatê Neteweyanê Yewbîyayeyan (NY) û Mehkemeya Heqanê Merdiman bikerê. Ganî cayê gorê Şêx Seîd û embazanê ci bêro eşkerakerdene. Ma pabeyê ci yê ke no mexdûrîyeto 97 serre hînî biqedo.''