Di nav mehekê de herî kêm 115 welatiyên kurd ji aliyê hikûmeta Îranê ve bi behaneyên cur bi cur hatine girtin.
Malpera mafên mirov ya Hengawê ragihandiye, meha Çileya îsal li bajar û deverên Rojhilatê Kurdistanê herî kêm 115 welatiyên kurd bi behaneyên siyasî, mezhebî û çalakiyên sivîl hatine girtin.
Li gorî agahiyan, 102 kes ji wan kesên ku hatine girtin, bi tohmetên çalakiyên siyasî û hebûna pêwendî bi partiyên Kurdistanî yên neyarên rêjîma Îranê hatine girtin. 9 kes bi tohmeta çalakiyên sivîl û 4 kes jî ji ber baweriyên xwe yên mezhebî hatine girtin.
Herî zêde li parêzgeha Ormiyê girtin hebûye, ew jî 72 kes bûne. Li Sine 27 kes û li Kirmaşanê jî 14 kes hatine girtin.
Di nav girtiyan de 9 kes jin bûne, 4 kes xwendekar bûne, 2 kes mamosta bûne û 3 jî rojnamevan bûne.