Merkezê Xeberan- Emmanuel Macronî London de kombîyayîşê NATOyî ra dima eşkerayîyêka çapemenîye kerde û vat ê nêeşkayê babeta pênasê terorîzmî de Tirkîya reyde pêbikê û înan red kerd ke YPG sey komêka terorîste bêro daşinasnayene.
Macronî kombîyayîşê çar terefanê ke Tirkîya, Fransa, Almanya û Brîtanyaya Pîle ra ameyêne meydan ra dima qisey kerd û vat: "Ma bi hawayêkê kolektîfî qebul kenê ke na babete ser o pêkerdişêk çin o."
Macronî vat: "Tirkîya sozê xo yê têkoşînê vera DAÎŞî bi hawayêkê eşkera mojna. Hetê bînî ra na zî eşkera ya ke ma terefgîr nîyê ke (YPG û PYD) sey komêka terorîste qebul bikê."
Serekomar Erdoganî kombîyayîşê berzî ra verî NATO şantaj kerd ke eke YPG û PYD sey komêka terorîste nêrê qebulkerdene o do teblîgatê netîceyî îmza nêkero.
Macronî kombîyayîşê berzî ra verî vatibi: "NATO seba ma merd o." û nê vatişê ci kombîyayîşê berzî de bi rojdem. Macronî seba îşxalê rejîmê tirkî yê vera Rojawanî NATO bi hawayêkê pîtî rexne kerdibi. Macronî eşkerayîyêka xo de dabi zanayene ke Tirkîya hetkarîya cerganê DAÎŞî kena.