Faîlê ey kam beno wa bibo, ma teqayîşo ke Dîyarbekir de bîyo şermezar kenê
Qezaya Rezan yê Dîyarbekirî de roja 05.11.2016 de bi teqayîşêko bombayî 11 kesan cuya xo vindî kerde, nêzdîyê 100 kes zî birîndar bîyê.
Derheqê failê nê teqnayîşî de gelek agahîyê cîya cîya vila benê.
Walîtîya Dîyarbekirî badê teqnayîşî beyanatêk da û vat “PKKyî no teqnayîş kerdo”. Dima goreyê xeberêka bîne DAIŞî vato “ma teqnayîş kerdo”. Roja 06.11.2016 de zî TAKî vat “ma no teqnayîş kerdo”.
Balkêş o ke, heta nika zî PKKyî derheqê nê teqnayîşî de tu beyanatêk nedayo ke ka eleqeyê înan pa esto yan çin o.
Aşkere yo ke teqnayîş hetê kamî ra bibo wa bibo, netîceyê kîştiş û wêranî orte ra nêwedarîyeno.
Hetê kamî ra bêro kerdiş wa bibo, ma nê teqnayîşê ke zerar dayo şarê ma, dayo welatê ma, dayo doza azadîya Kurdistanî şermezar kenê.
Nê tewir fealîyetî û tûjîyî û şer, rayîrê çareserîyê sîyasî gênê, çareserîyê problemê Kurd û Kurdistanî giran kenê, dûrî fînenê. Dewleta Tirke wazena verê şarê ma bido şerî û sîyaseta PKK yê şerî zî sîyasetê Dewleta Tirke rê zemîn amade keno.
Gereka demo kilm de no şer vindero, ganî Rewşa Awarte biqedîyo, û rayîrê çareserîyê sîyasî abo ke heme partîyê Kurdan sey muhatab qebûl bibê.
Ma seba malbatanê qurbananê nê teqnayîşî serweşî wazenê. Homa înan bi rehma xo şa biko, cayê înan bihişt bo. Ma seba birîndaran şîfaya xeyrî wazenê. Ganî seba zeraro ke bi nê teqnayîşî resayo şarê ma, ca de bêro telafî kerdiş.
07.11.2016
HEREKETÊ AZADÎ, PAK, PAKURD, PDK BAKUR, PSK