Beyanato ke hetê PAKî ra ame dayene wina yo:
“Kurdê Mêrdînîjî ke semedê arêdayîşê findiqan şibî Sakarya, înan rê hetê keyeyo ke wayîrê hêgayê findiqan bi ra hêriş ame kerdene.
Kesê ke hêriş kerdê, hetêk ra Kurdî derb kerdê, hetêk ra zî semedê nasnameya înan a Kurdîtî, înan rê heqeret kerdê, nengî çînayê.
Walîtîya Sakarya û qismêk nêzdîyê AKP, ewilî vatê, hedîseyêka wînayêne nêbîya, xeberê ke pare bîyê zûr ê.
La wexto ke keyeyo ke rastê herîşî ame beyanat da, aşkere bi ke, kesê ke hêriş kerdê bi helwesta nijadperestî hêrîş kerdê û sey dişmenê Kurdan bî.
Sebebê ey çi beno wa bibo, heqereto ke keyeyê Kurdî rê bîyo, hêrişo ke ameyo kerdene, esasê xo dehemine Kurdan rê bîyo. Gere ma pêro nê hêrişî wîna bivîne û name bike.
No hêriş zî eserê deweleta Tirkîya yo, semedo ke dewleta Tirkîya vera Kurdan sîyetê şowen kena, coka nê hêrişî benê. Nê hêrişê newe nîyê, verî zî zaf bîyê.
Dewleta Tirkîya, îdarekarê aye bi vatişanê xo yê nijadperetî û şowenan benê sebebê nê hêrişan. Dewlete her çî ra ver mesûlê nê hêrişan a.
Dewleta Tirkîya û pêro rayberîya aye bi sîyasetê vera Kurdan benê sebebê hêrişanê winasîyan, ma venga dewleta Tirkîya danê ke, wa ca de fek sîyasetê xo yê vera Kurdan ra verado.
Ma hêrişo ke Sakarya de karkeranê Kurdan rê bîyo, hêriş û heqeretê ke nasnameyê Kurdîtî rê bîyo şermezar kenê. Ma venga dewleta Tirkîya, rayberanê dewlete danê ke, wa serê hedîse nêgîrê, fek zûran ra veradê û kesê ke mîyanê nê hêrişî de ca girewtê vejîyê mehkema ver û muhakeme bibê.”
05.09.2020
Buroya Çapemenî û Têkilîye ya PAKî