Çend rojîyo ke adir kewto daristanê qezaya Amedî Licê. Semedo ke heta nika adirî rê mudaxele nêameyo kerdene bi rojano ke daristanê Licê vêşenê. Adir qismêk ameyo hewnakerdiş la vajîyeno ke hezaran heywanî şewat de vêşayê.
Adir 3 rojî verê cû dewanê Derxust, Sisê, Cinezûr, Cimar û Henyatî de vejîya. Çend rojîyo ke şarê Licê pê îmkananê xo adirî rê mudaxele keno û keno ke adirî hewna bikero. Vajîyeno ke şewat qismêk ameyo kontrolkerdiş. Eke mudaxele nêamêne kerdene adir heta zereyê dewan amêne.
Şewat de hezaran dolim daristan bi wele. Heto bîn ra vajîyeno ke şewatê daristanan de hezaran ganeyî vêşayê û merdê. Bi hezaran darî zî bîy wele. Xeylî ganeyî zî mintiqa ke tede şewat vejîya ra koç kerd.