Li kampa Holê ya li Hesekê bi hezaran malbatên DAIŞê di nava hatine bicihkirin, termên 6 kesan kuştî hatin dîtin.
Li gor raportên medyayî, di du rojan de asayişa kampa Holê termê 6 kesan kuştî di nava konên kampê de dîtin. Hat zanîn ku 4 ji wan koçberên sûrî ne û 2 kes jî penaberên Iraqî ne.
Lêpirsînên Hêzên Ewlekariya Hundirîn derbarê wan bûyeran de ji bo naskirina tawanbaran destpê kiriye. Tê gûmankirin ku berpirsên van bûyerên kuştinê, çekdarên DAIŞê bin.
Kampa Holê li rojhilatê Hesekê ye, li gor amarên Netewên Yekgirtî 65 hezar kes tê de hatine niştecîkirin. Hemû wan malbat û xizmên çekdarên DAIŞê ne. Hinek ji wan biyanî, iraqî û beşek jî welatiyên Sûriyê ne.
Li gorî hin raporên saziyên navdewletî, kampa Holê yek ji kampên herî metirsîdar e ser asta cîhanê. Rêvebiriya xweser jî dibêje ku karînên wan sînordar in, nemaze ku bi hezaran çekdar jî di zindanên wan de hene, êdî ev rewş hewcedarî destêwerdaneke navdewletî ye.