Li Herêma Kurdistanê, îro hilmeta derzîkirina li dijî vîrûsa Koronayê destpê kir û bijîşk û karmendên tendirustiyê di destpêkê de derziyê werdigrin.
Derziya vîrusa Koronayê moleta bikaranînê wergirt û hilmeta derziyê bi karmendên tenduristiya Hewlêrê ve destpê kir.
Bi amadebûna Wezîrê Tenduristiyê yê Hikûmeta Herêma Kurdistanê û Parêzgerê Hewlêrê ve, îro 04.03.2021ê hilmeta derziyê ya karmendên tenduristiya Hewlêrê ya li dijî vîrusa Koronayê destpê kir û yekem kesê derzî lê hate dayîn karmendekî tenduristiyê yê bi navê Goran Osman Bayiz bû li binkeyê tenduristiyê yê Şemamk a Hewlêrê, ku di beşa çavdêriya hûr li nexwaşxaneya Rojava ya ji bo çareseriya pêketina vîrusa Koronayê kar dike û yekem derzî wî wergirt.
Karmendê Tendirustiyê Goran Osman Bayiz ku yekem kesê vaksîn wergirt da zanîn: “Hest bi xweşiyê dikim ku ez yekem kesê derziyê werdigre me. Ez dixwazim her Kurdek biçe û derziyê werbigre. Bi hêviya ku em ji vê nexweşiyê xelas bibin.”
Karwanê yekem a derziya Sinopharm a Çînî, pêr 2ê Adarê gihîşt Herêma Kurdistanê, ku ji 5 hezar derziyan pêk dihat. Ew derzî li ser binkeyên tendirustiyê yên Parêzgehan hatin belavkirin.
Wezîrê Tendirustiyê Dr. Saman Berzincî diyar kir, di qonaxa yekem de, lêdana derziyê li 8 navendan destpê dike.
Herwiha Konsolê Çînê li Hewlêrê di derbarê wê de ragihandibû, ew ê bi Hikûmeta Herêma Kurdistanê re, ji bo dabînkirina derziyê berdewam bin.