Cejna Netewî ya gelê Kurd Newroz li her çar beşên Kurdistanê digel pandemiya koronayê û hin astengiyên li ser beşên nehatine rizgarkirin jî di nav gelê Kurd de bi coş û peroşeke mezin hat pîrozkirin.
Cejna Newrozê li Başûrê Kurdistanê betlaneya fermî ye û îsal ji ber metirsiya belavbûna koronayê ahengên qelebalix nehatin lidarxistin, lê bi awayê sembolîk agirê Newrozê hat vêxistin û bi kombûnên zêde ne qelebalix têvî rêkarên bo vîrusa koronayê Newroz hat pîroz kirin.
Li Bakurê Kurdistanê û bajarên Tirkiyê yên serjimariyeke mezin a Kurd lê dijîn Newroz bi ahengên mezin û girseyî hat pîrozkirin.
Li bajarên bakurê Kurdistanê Amed û Wanê ahengên herî qelebalix di roja 21ê Adarê de hatin lidarxistin û bi coşeke mezin Newroz hat pîrozkirin.
Li seranserê Rojavayê Kurdistanê jî ji xeynî bajarên Efrîn, Serê Kanî û Girê Spî ku hatine dagirkirin, bi beşdariya sed hezaran welatiyan Newroz hat pîrozkirin ku Rêveberiya Xweser û ENKSê ahengên cuda yên pîrozbahiyan li dar xistin.
Herwiha li Rojhilatê Kurdistanê jî kevneşopiya Cejna Newrozê bi pîrozbahiyan tevî hemû astengiyên rejîma Îranê jî hat dewamkirin û Newroz bi ahengên cuda agirê Newrozê hat geşkirin û bi cil û bergên Kurdî hat pîrozkirin.
Li piraniya gund û bajarokên Rojhilatê Kurdistanê yên Bokan, Pîranşar, Seqiz, Bane û gelek cihên din bi hinceta vîrusa koronayê hêzên îranê rê nedan Newroz bê pîrozkirin, lê dîsa jî gel agirê Newrozê vêxist û bi coş pîroz kir.