Li navenda Efrînê yê Rojavayê Kurdistanê, do şev şerekî dijwar di navbera komên çekdar de derket.
Li gor çavkaniya taybet ji nav bajarê Efrînê daye zanîn, şer û pevçûn di navbera koma Ehrar el-Şerqiye û Fîrqeya 9 de, li cadeya Wêlat li navenda bajarê Efrînê derketin.
Zanyariyên wê çavkaniyê destnîşan kirine, di şer de çekên otomatîkî û RBG hatine bikaranîn û di encamê de, herî kêm 5 kes birîndar bûne.
Di nav birîndaran de fermandeyekî serbazî bi navê Ebû Ebdo Elolo, û medyakarê Ehrar el-Şerqiye Haris Rebah, û jinek û zarokek û ciwanek hene.
Medyakarê Ehrar el-Şerqiye Haris Rebah, wekî “medyekarê kujer” tê binavkirin, ji ber ku ew dîmenên kiryarên kuştinê yên ji aliyê çekdarên Ehrar el-Şerqiye ve dikişîne.
El-Haris Rebah, dîmenên kuştina siyasetvana Kurd Hevrîn Xelef ji aliyê çekdarên koma bi fermandariya Ebû Hatim Şeqra ve, di dema êrîşa sala 2019 a Tirkiyê li ser Rojavayê Kurdistanê de kişandibûn.
Koma Ehrar el-Şerqiyê û her du fermandarên wê Ebû Hatim Şeqra û Ebû Cafer Şeqra, meha borî, ji aliyê Amerîka ve ketin nav lîsteya cezayan.