Ji destpêka sala 2021ê ve heta niha, zêdetirî 27 hemwelatî li herdu bajarên Efrîn û Girê Spî hatine girtin.
Navenda Belgekirina Binpêkirinan li Bakurê Sûriyê daxuyaniyek belav kir û binpêkirina di heyama 18 rojên sala 2021an de belav kirin.
Li gor daxuyaniya wê navendê ji destpêka sala 2021an ve, li herdu bajarên Efrîn û Girê Spî yên Rojavayê Kurdistanê 27 kes ji aliyê grûpên çekdar ên sr bi Tirkiyê ve hatine girtin.
Navenda Belgekirina Binpêkirinan li Bakurê Sûriyê aşkere kir ku 4 zarok û 4 jin jî di nav wan kesên hatine girtin de hene.
Li gorî zanyariyan, di meha borî de grûpên çekdar ên ser bi Tirkiyê ve 137 kes li Efrînê girtin û navên wan ji aliyê heman navendê ve hatine belgekirin.
Ji 18ê Adara 2018an ve li Herêma Efrînê girtina 7 hezar û 83 kesan ji aliyê grûpên çekdar ên ser bi Tirkiyê ve, hatiye belgekirin.
Her li gor zanyariyên hatine belavkirin, ji wê hejmarê hezar û 41 kes hatine îşkencekirin, 133 kes hatine kuştin, 5 hezar kes hatine berdan û çarenivîsa girtiyên mayî nehatiye zanîn.
Herêma Efrînê ya Rojavayê Kurdistanê 18ê Adara 2018an, piştî êrîşeke ku nêzikî 2 mehan berdewam kir, ket destên artêşa Tirkiyê û grûpên çekdar ên ser bi wî welatî ve.
Ji wê demê heta niha li Efrînê bi dehên kiryarên revandin û destdirêjiya jin û keçan ji aliyê grûpên çekdar ên ser bi Tirkiyê ve hatine kirin, herwiha zewaca bizorê û xwestina fidyeyê ji kesûkaran jî bû ye wek nerîtekê ji aliyê wan grûpên çekdar ve.
Herwiha ji dema kontrolkirina Efrînê ji aliyê Tirkiyê û komên çekdar ve, bi dehan haletên binpêkirina mafên mirovan li hember welatiyên resen ên herêmê ku Kurd in, hatine kirin û rêxistinên mafên mirovan ên herêmî û cîhanî li ser wan binpêkirina raport belav kirine.