Li Çewlîga Bakurê Kurdistanê jineke 91 salî ji nexweşiya Covid-19ê rizgar bû.
Li bajarokê Ilicalar ê ser bi Çewlîgê ve jina bi navê Ayşe Gençdogan, roja 25ê Adarê ji ber êşa sîng, pişt û ser bo nexweşxaneyê hat veguhastin û di encama pişkinînan de derket holê ku ew jin bi Coronayê ketiye.
Ew jina temenmezin ji nexweşaxaneyê bo malê hat veguhastin û li malê çareserî werdigirt.
Ayşe Gençdogan a 91 salî piştî 10 roj ji heyamek bi êş û jan û zehmet, ji Coronayê rizgar bû.
Li gor zanyariyan, berî Gençdogan kur û bûka wê jî bi Coronayê ketibûn.
Ayşe Gençdogan ku her li gund maye û bi xwarinên sirûştî dijî, behsa wan rojên nexweşiyê kir û got, “Di roja yekem a nexweşiyê de gelek ser û hestiyên min diêşiyan, piştre ez diricifiyam û min xwe nêzîkê sobeyê kir lê ev ricifîn derbas nebû.”
Herwiha Gençdogan diyar kir, “Sîng, qirik û zikê min diêşiya û min nefes nedistand, min hest dikir ku ez ê ji serma bimirim. Ji ber vîrûsê hundirê devê min hemû bû birîn û qet dilê min nediçû xwarinê.”
Gençdogan dibêje, piştî rizgarbûna ji Covid-19ê jî dîsan pirsirêka wê ya wergirtina nefesê heye.
(Rûdaw)