Di destpêka eşkerebûna bûyerê de wiha hatibû belavkirin, ku herdu Zebîhî yên bira di encama bûyere trafîkê de canê xwe ji dest dane, lê belê piştre endamên malbata wan û çend çalakvanên bajarê Baneyê ragihandin, ku wan guman ji bûyerê heye û daxwaza lêkolînê kirin.
Qayimmeqamê Baneyê ragihandiye, ew herdu bira hatine kuştin û kesê kujer ji aliyê hêzên polîs ve hatiye desteserkirin û di proseya lêkolînê de jî ji tawana xwe mikur hatiye, lê belê sedema kuştinê eşkere nekiriye.
Rehîm Zebîhî ku derhênerekî bi nav û deng ê Rojhilata Kurdistanê ye, di sala 1971ê de li bajarê Bane ji dayîk bûye.
Zebîhî xwediyê çendîn kurtefîlman e û bi dehan xelatên navxweyî û cîhanî wergirtine.
Doh Yekşembê termê derhênerê Kurd Rehîm Zebîhî û birayê wî li Beşa Hunermendan a Goristana Silêman Beg a bajarê Baneyê bi axê hate spartin.