Berpirsê Pêwendiyan ê Komeleya Zehmetkêşên Kurdistanê Emced Penahî ragihand ku li navçeya Xelîfanê ya Hewlêrê bi 4 dronan êrişî kampeke wan hatiye kirin.
Wî diyar kir ku 2 dron ji aliyê Hêzên Hevpeyman ve hatine têkşikandin.
Emced Penahî îro ji Rûdawê re axivî.
"Di nava 20 xulekan de 4 dron"
Emced Penahî li ser êrişê agahî dan û got:
"Nêzîkî demjimêr 21:20î êrişê dest pê kir. Di nava 20 xulekan de bi 4 dronan êrişî kampa me ya li Dola Alaneyê ya li navçeya Xelîfanê hat kirin."
Emced Penahî diyar kir ku ji wan 4 dronan du dron li kampa wan ketine û got:
"Du dronên din ji aliyê Hêzên Hevpeyman ve hatin têkşikandin."
Tenê zererên madî hene
Berpirsê Komeleya Zehmetkêşên Kurdistanê da zanîn ku di êrişê de ti zererên canî çênebûne û tenê zererên madî çêbûne.
Agirbesta di navbera Amerîka û Îranê de didome lê belê bombebaranên li ser Herêma Kurdistanê jî didomin.
Li gorî şopandinên Rûdawê, piştî agirbestê bi 79 dron û mûşekan êrişî Herêma Kurdistanê hatiye kirin.