Koçerê Şavakî yê Dêrsimî heywankarî kenê la semedo ke mesrafê înan zaf ê nêeşkenê pê debara xo bikerê. Koçerî vanê: Dewlete vayîya merayan hîrê qatî zêdînay.
Koçerî pê rotişê şit û pendîrî debara xo kenê.
Koçerê Şavakî wisar şinê Koyê Pilemurî û payîz de agêrenê. Koçeran derheqê meseleyanê xo de PÎRHA rê qisey kerd.
Koçer Azîz Benler (53) îzah keno ke emser hem mesrafê înan zaf o hem zî ziwatî esta. Benkerî vat: ''Mengêk a ma nê wareyî de yê. pendîr hînî pere nêkeno, ma pendîr xo danê bazirganan. Çew halê ma nêperseno. Dewlete semedê nê wareyî ma ra qasê 701 hezar lîra kîra gêna. Kîloyê simêrî 3 lîra yo, ziwatî esta coka vaş zî çin o. Emser awe zî çin a.''
Mahîr Benler (47) hem koçerîye keno hem zî pendîran arê dano erşaweno depoyê serdinî yê Xarpêtî. Mahîr Benlerî îzah kerd ke ziwatî ra awe û vaş çin ê û vat: ''Ma Pêrtagî ra ameyî Koyê Pilemurîye û ma tîya kerd kîra. Dewlete emser vayîya merayan zêdînaye. Mesrafê ma zaf o. Şiwanî meaşo zêde wazenê. Wa dewlete bêra halê ma bivîna.''
Koçerê bi nameyê Denîzî zî da zanayene ke zehmetîyê koçerîye zaf ê û vat: ''Ez meşnayan çarnena. Tîya de verg esto, heş esto. Şanan hewa serdin o. Ma kîloyêk pendîr 20 lîra ra roşenê. Ma nêeşkenê heqê keda xo bigêrê. pereyê şîwanî, kîrayê mera... Û ma rê çîyêk nêmaneno.''
Çime: Pîrha