Kênayanê vînîbîyayeyan ê Dêrsimî ra Fatma Îçîna ke wextê Terteleyê Dêrsimî de hema ke 10 serrî bî ameye remnayene, şîye heqîya xo.
Kênayanê vînîbîyayeyan ê Dêrsimî ra Fatma Îçîn (95) ya ke wextê Terteleyê Dêrsimî de hema ke 10 serrî bî ameye remnayene, şîye heqîya xo.
Fatma Îçîna ke qirkerdişê 1937-1938î de ameye remnayene û dîyaye leşkerêkê payeberzî qezaya Kahta ya Semsûrî de şîye heqîya xo. Cuya Fatma Îçîn hetê Nezahat Gundogan û Kazim Gundoganî ra sey kitabî amebi nuştune û fîlmê ci yo belgekî amebi antene. Nuştox Gundoganî hesabanê xo yê medyaya sanalî ra da eşnawitene ke Fatma Îçîn şîya heqîya xo.
Gundoganî dejê xo ard ziwan, serweşîye waşte û nê vatî: ''Fama gama ke mîyanê terteleyêkî ra kokê xo ra ameye raqilnayene û remnayene hema 10 serrî bî. Gijikê aye qesna û daye keyeyêkê leşkerê payaberzî. Ûca çi nêant ke? Serran ra dima ameye zewijnayene, domanê ci bîyî û bîyî pîl. Derdê xo domananê xo rê vatî û pîya bi înan semedê gêrayîşê kokanê xo kewt rayîrê Dêrsimî. Çew nêdî û gama ke agêrayî Kahta yew çengê herre girewt ke wa badê mergê ci bişanê serê gorê ci. Dima ra waya xo Bursa de dîye û ameyî têhet. Gama ke ameyî têhet waya ci vat 'waye ma elewî yê' Fatma zî cayê waya xo de nimaj nêkerd.
Eke nê wird wayan Fatma û Hurîye qisey nêkerdêne û ma fîlmo belgekî yê Kênayê Vînîbîyayeyî yê Dêrsimî nêviraştêne beno ke Kênayê Vînîbîyayeyî yê Dêrsimî nêameyêne zanayene û Terteleyê Dêrsimî wina hîra her ca de nêameyêne qiseykerdene. Coka hîkayeyê Fatma û Hurîye nuşte û vatişê tarîxê fermîyî rijna û belgeyêko zaf mumîm vet werte. Tarîxî nê belgeyî qeyd kerdî. Ma înan rê zaf çî deyndarê.''