Rêveberê navenda lêkolînên jenosîdê li zankoya Duhokê Dr. Salim Casim diyar kir, Keleha Nizarkê yek ji wan cihê ku xelkê Duhokê tê de hatiye enfalkirin e û niha kar tê kirin ku Keleha Nizarkê bibe mûzexaneya Enfalan.
Rêveberê navenda lêkolînên jenosîdan li zankoya Duhokê Dr. Salim Casim ji BasNewsê re daye xuyakirin: “Nav Keleha Nizarkê de 33 sal berî niha xelkê Duhokê hatin îşkence kirin û zulm û zordarî li xelkê Badînanê hat kirin û hatin enfalkirin. Heta îro 25.08.2021ê jî hin termên enfalbûyên Badînan ne diyar in. Herwiha heta niha cih û warên enfalan mane û me girîng û fer dît ku li gel rêxistina 88 a nasandina enfalan, li gel rêveberiya giştî ya rewşenbîrî û hunerê li Duhokê amadekarî bên kirin ku Keleha Nizarkê bibe mûzexaneya enfalan li Duhokê.’’
Salim Casim diyar kir: “Keleha Nizarkê dê bibe mûzexane û hemû tiştên enfalan dê di nav de bên parastin, ku her bimîne. Herwiha xelk bizane di vê kelehê de çi zulm û zordariyek ji aliyê rejîma dîktator a hilweşyayî ya Iraqê ya Beis ve li gelê kurd hatiye kirin.”