Îbrahîm Layiko ke Teyaragehê Îstanbulî de xebityêne vizêr xo kiştbi. Îbrahîm Layikî xo kiştişî ra ver hesabê xo yê Instagramî ser o fotografa xo pare kerdbi û vatbi “Semedo ke ez Kurd a ez rastê neheqî yena” û nijadperestî ver xo kiştbi.
Kekê ey Omer Layikî derheqê hedîse de qisey kerd û va: Ma musayê ke birayê mi merdiş ra ver hetê şîrketê İGA ra kar ra amo eştene.
Heto bîn ra seba Îbrahîm Layikî Nêweşxaneyê Dewlete yê Arnavutkoyî de otopsî amey kerdene. Ame vatiş ke raporê otopsî do pey ra bêro aşkerakerdiş. Seba raporê merdişî yê Layikî zî ame vatiş ke “Merdişê ey gumandar o”
Tirmê Layikî zî seba definkerdişî erşawîya qezaya mêrdînî Nisêbîn. Tirmê ey do ewro bêro definkerdene.
‘HEDÎSE RA VER KAR RA AMO EŞTENE!’
Keyeyê Îbrahîm Layikî merdişê ey ver gumadar o û wazeno wa hedîse ser o cigêrayîş bêro kerdiş. Kekê ey Omer Layikî wina va: Vajîyeno ke birayê mi “Seba kênaya ke tira hes kerdo xo kişto.” Ma bawer nêkenê ke birayê mi wina yew çî ver xo kişto. Seba na hedîse gumanê ma estê. Ma heta nika şîrketo ke birayê mi verê înan de xebitîyêne ra zanayîşêk nêgirewto. La ma pêhesîyê ke birayê mi merdiş ra ver hetê şîrketê teyaragehî (İGA) ra kar ra amo eştene. Aye ra ma venê, no merdiş merdişêko normal nîyo.