Şarê ma îsot rê hes keno la îsot zehf zehmet yeno arêdayîş. Şarê ma yo ke Kobanê ra seba şer û pêrodayîş ameyo wîlayetê Vakurê Kurdistanî bi arêdayîşê îsotî debara xo keno. La welatî vanê xebata arêdayîşê îsotî zehmet a.
Meysa Ahmî ke ji Kobanî ra ya û qezaya Riha Pirsûs de mîyanê germê zêdeyî de xebitîyena vana "Îsotê Riha weş o, la mîyanê nê germî de no kar qet weş nîyo."
Îsotê Riha namdar o û heme dinya de zanîyeno. Labelê no wext de, germê Riha de, bînê 42 derece germî de kare arêdayîşê îsotî zor o. No kar seba karkeran karêko zehmet o.
Qezaya Riha Pirsûs, Taxa Mizêbila Cêrîne de cinîyê şarê Kobanê paletîya arêdayîşê îsotî kenê. Cinî vanê: Ma şefeq de dest bi kar kenê. Ma saete 6 de dest ci kenê û heta şan saete 6 karê ma dewam keno.
Serhildan Hacimûrata ke seba hêrişê DAIŞ Kobanê ra ameya Pirsûs û merdimanê xo het de manena vana: "Îsotê Riha weş o, la arêdayîşê ey qet weş nîyo. Ma serê kîloyî xebitîyenê, serê kîloyî 75 qurîş o."
Zergê Hesena ke bi qijanê xo hêga de xebitîyena zî vana: "Gama ke ma îsot arêdanê destê ma vêşenê. Seba nê germî ma rey-rey nêweş benê. Ma heta şan xebitîyenê. Peeyo ke ma gênê zî qîm nêkeno. Her çî vay o.