Merkezê Xeberan- Hêzê sîyasî yê Iraqî pêkerdbî ke îxtîdaro nikayên bêro pawitene. Çalakîyanê şermezarkerdişî de roja şemeyî 7 kesî ameyî kiştene. Paytext Bexdad bi sey meydanê şerî.
Dormeyê meydanê Tehrîrî yê paytext Bexdadî de 3 kesî pê fîşekan û kesêk zî pê bombaya gazî merd. Eynî roje de 3 çalakîgerî zî şaristanê Basra de bi fîşekan ameyî kiştene.
Hêzanê dewlete aşkere kerd ke Basra de kam beno wa bibo oyo ke bivejîyo teber do bêro tepiştene. Hêzê sîyasî yê Iraqî îstîfayê Serekwezîr Adil Abdulmehdîyî taloq kerdibi. Na rey zî seba pawitişê îxtîdarî pêkerd. Muqteda Sadro ke rayberê Şîa yo û terefgîrê çalakîkeran bi zî tede yo. Yeno vatene ke Sadrî tedaya Îranî vera qirarê xo bedilnayo. Zaf kombîyayîşan ra pey hêzê sîyasî reformê ke waştişanê çalakîkeran ra dûrî yê ser o pêkerd. Çalakîkerî Qanûnê Bingeyî yo newe teleb kenê la hêzê sîyasî qirar day ke bi tedayan çalakîyan biqedînê.
Gore AFPyî hêzanê sîyasî pêkerd ke Serekwezîr Adil Abdulmehdî îxtîdar de bimano û bi tedayan çalakîyan vindarnê. Gore hesabanê AFPyî 1ê teşrîna peyêne ra heta nika 300 kesê ke zafê înan nawnayîşkerî bîyî, ameyî kiştene û 12 hezar kesî zî birîndar bîyî.