Îran û Rojhelatê Kurdîstanî de serewedaritişê şarî 16ê êlule ra nata 95 rojî yo dewam keno.
Îran û Rojhelatê Kurdîstanî de serewedaritişê şarî 16ê êlule ra nata 95 rojî yo dewam keno. Têgêrayîşê şarî yo ke pêro welatî de vila bîyo, bi çalakîyan dewam keno.
Rojhelatê Kurdîstanî ra heta bi Tehran û Kermanî bi desan şaristanan de çalakîyî ameyî kerdene. Goreyê çimeyanê muxalîfan çalakîyî 280 şaristanan rê vila bîyê.
19ê kanûne de vizêr seba 3 rojan grevo pêroyî yo newe dîya destpêkerdene. Şaristananê Rojhelatê Kurdîstanî Kirmanşan, Sine, Seqiz, Kamyaran, Dîwandere, Eywan, Xerb û ê bînan de dikanî nêameyî akerdene.
Cenazaya çalakîkere Muhammed Hacî Resûlo ke bi îşkenceyî hetê hêzanê dewleta Îranî ra amebi qetilkerdene şaristanê Bokanî de bi şîarê 'Şehîdî nêmirenî' ame definkerdene. Mahabad de zî bi seyan kesî tewrê şînê Fayeq Mamqadirîyî bîyî.
Îran de zî çalakîyî dewam kenê. Şaristanê Raştî de verî cinîyan rayraşîyayîşêk kerd, dima zî ciwanan kuçeyan de adir vist ta. Herêma Gulşarî ya Kerecî de şar reyna vejîya meydanan û nêrazîbîyayîşê xo mojna.
Goreyê Rêxistina Heqanê Merdiman a Îranî 16ê êlule ra nata çalakîyan de tewr tay 469 kesî ameyî qetilkerdene. Goreyê çimeyanê muxalîfan zî 700 kesî ameyê qetilkerdene.