Merkezê Xeberan - Îran de hûmara nêweşanê virusê Korona roje bi roje zêde bena û heta naka Îran de 2 hezar û 234 kesî vîrusê korona ra merdê.
Ewro (26.03.2020) verfekê Wezîrîya Weşîye yê Îranî Dr. Kiyanûş Cîhanpûrî kombîyayîşê çapemenî de qisê kerd û va: vîzîr ra nata pêroyê Îranî de 157 kesê bînî vîrusê korona ra merdê û hûmara merdeyan bîya 2 hezar û 234.
Dr. Cîhanpûrî îzah kerd ke, vîzîr ra nata 2 hezar û 389 kesê bînî bi virusê Korona kewtê û hûmara kesê ke bi vîrusî kewtî zî bîya 29 hezar û 406.
Gorê vatişanê ey, Îran de heta naka 10 hezar û 456 kesî vîrusê korona ra xeliyayê û bîyê weş.