Serekê Beledîyeya Îstanbulî Ekrem Îmamogluyî seba Selahattîn Demîrtaşî yewna beyanat da û va: Eke îmkan bibo ez wazena ey zî ziyaret bikî.
Serekê Beledîyeya Bajarê Girdî yê Îstanbulî Ekrem Îmamogluyî Îstanbul de Teşkîlatê HDP yê Îstanbulî ziyaret kerd. Îmamogluyî seba Hemserekê HDP yo verîn Selahattîn Demîrtaşî va: Eke îmkan bibo ez wazena ey zî ziyaret bikî.
Ekrem îmamogluyî ewro Partîya Saadetî û İYİ Parti ra dima Partîya Demokratîk a Şaran (HDP) ziyaret kerd.
Ekrem Îmamogluyî dima ra vejîya kamerayan ver û ci rê ame perskerdiş ke, ti do Selahattîn Demîrtaşî zî ziyaret bikî yan ney? Ekrem Îmamogluyî naye ser va: Helbet eke îmkan bibo ez wazena Demîrtaşî zî ziyaret bikî. Ez seba destegê Demîrtaşî yo ke weçînayîşê 23ê Hezîrane de dayo mi sipas kena. Her tim ma ra yeno perskerdiş ke, Selahattîn Demîrtaş çi ra hepisxane de yo. Ez zî wazena fehm bikî ke çi ra Demîrtaş zere de yo. Kamo ke hetê huquqî ra ameyo mexdurkerdiş ez kişta ey de ca gêna.
Seke yeno zanayîş Hemserekê HDP yo verîn Selahattîn Demîrtaşî weçînayîşê meheli yê Îstanbulî de desteg dabi namzetê CHP Ekrem Îmamglu. Ekrem Îmamoglu 31ê Adare de weçînayîşê Îstanbulî de bi destegê HDP û İyi Parti qezenc kerdbi û bibi serekê Beledîyeya Îstanbulî. La îtîrazê AKP ser o YSK weçînayîş betal kerd û qerar da ke wa weçînayîşê Îstanbulî 23ê Hezîrane de bêro newekerdiş.
23ê Hezîrane de weçînayîş ame newekerdiş û namzetê CHP Ekrem Îmamgluyî na rey bi 9 puan ferq eşt namzetê AKP û newe ra weçînayîş qezenc kerd.