ÎHD’yî derheqê îşkenceyê Hepisxaneyê Osmanîye yê Tipê T’yî yê Hûmara 2’ine de roporêk eşkera kerd û vat Hepisxaneyê Osmanîye de îşkence esto.
Komeleya Heqanê Merdiman (ÎHD) bi raporêk da pêhesnayene ke Hepisxaneyê Osmanî ye de tepişteyan rê îşkence yeno kerdene.
Endamanê Komîsyonê Zîndanan ê Edena ê îHD’yî yê bi tepişteyanê Hepisxaneyê Osmanîye pêvînayîşî viraştî, û derheqê binpaykerdişê heqanê tepişteyan de rayapêroyî dir raporêk pare kerd. Rapor de ame vatane ke tepişteyê nêweşî nênê tedawîkerdene, tepişteyî payra yenê hûmartene û bisebebo ke naye qebûl nêkene raştê şîdetî yenê. Reyna aktîvîteyanê sosyalî ra zî mehrûm yenê verdayene, heqanê xo yê huqûqî nêeşkenê bişuxulnê û kovare û kitab û rojnameye fermî zî nêdîyenê înan.
Endamanê komîsyonî tepişteyan ra Sabrî Kaya, Akar Îkbal, Veysî Baltaş, Mehmet Îpek, Îbrahim Sutçu, M. Şîrîn Arat, Mehmet Farûk Engîn û Îbrahîm Halîl Karataşî dir zî pêvînayîşî viraştî û derheqê qewimîyayîşanê zîndanî de fîkrê înan girewt. Tepişteyê ke raştê îşkenceyî yenê ard ziwan ke rixmo ke nêweşê giranî zî mîyanê înan de estê, nênê tedawîkerdene, raştê hêrişê fîzîkî û psîkolojîkî yenê û heme heqê înan ê bingeyênî yenê binpaykerdene.