Merkezê Xeberan- Mudirê Îstîxbaratê Eskerî yê Iraqî Saad El Allakî beyanat da CNN û va: Xeylê mesulê DAÎŞî nika kampanê Tirkîya de yê û eşkenê Tirkîya de newe ra xo organîze bikê û pereyan arê bidê.
Allakî îfade kerd ke wextê derbasbîyayîşî de komêka DAÎŞî ya rojhelatê Sûrîye rema û nika herêma Dîlokî ya Tirkîya de ya. Çekdarê DAÎŞ sînorê Sûrîye-Tirkîya ra bi hetkarîya qaçaxçîyan derbazê nê herêmanê Tirkîya bîyî. Elaqî va ke, çekdarî nika Tirkîya de yê û terorîstan perwerde kenê.
Saad El Allakî va, beyanatê peyênî yê çekdaran mojneno ke seba ke zîndanê Iraqî û Sûrîye ra biremê planan kenê. Allakî venga dewletan da ke vera na dewa tewirêk bimojnê çunke çekdarê DAÎŞî yê ke do abigêrê welatanê xo Ewropa, Rûsya û vakurê rojawanê Afrîka eşkenê reyna têbigêrê.