Serekê Baroyê Amedî yo verîn Mehmet Emîn Aktarî rê seba ke tewrê karanê KCDyî bîyo bi îdîaya 'endamîya rêxistine' cezaya zîndanî ya 6 serran û 3 mengan dîya.
Serekê verênî yê Baroyê Amedî Mehmet Emîn Aktarî rê seba ke tewrê karanê KCDyî bîyo bi îdîaya 'endamîya rêxistine' û 'propagandaya rêxistine' dewa amebî akerdene. Roniştişê dewa Mehkemeya Cezaya Girane ya Amedî de ame kerdene.
Aktar tewrê mehkeme nêbi la avûkatê ci Resul Tamur û Semra Balyan roniştiş de amade bîyî.
Avûkat Tamurî pawitişê xo de ard ziwan ke KCD dezgehêko fermî yo. Avûkate Semra Balyan zî îfade kerd ke dewa de bêusûlîye ameye kerdene û waşt ke Aktar vera bidîyo.
Mehkeme bire daye ke Aktar 'propagandaya rêxistine' ra vera bidîyo la bi îdîaya 'endamîya rêxistine' mehkeme cezaya zîndanî ya 6 serran û 3 mengan daye Aktarî.