Hêzên Sûriya Demokratîk (HSD) bi daxuyaniyekê, bersiv da duxayaniyên Wezareta Berevaniya Tirkiyê û red kir ku 6 şervanên wan bi êrîşa artêşa tirk can dane.
Navenda Ragihandin û Çapemeniyê ya HSDê di daxuyaniya xwe de diyar kir, “Wezareta Berevaniyê ya Tirkiyê bi belavkirna îdiayên derew li ser malper û hesabên xwe yên fermî, asta bêçaretiya xwe nîşan dide.”
HSDê li ser îdiaya kuştina 6 şervanan wiha got: “Li gorî wan nûçeyan rojên 4 û 8ê Gulanê qaşo li herêma ‘Diri El-Firat’ 6 şervanên me şehîd bûne û çeperên me hatine rûxandin. Ev nûçe derew e û ji rastiyê dûr e.
Dewleta Tirk îdia kir ku 2 û 5ê Gulanê li herêma Efrînê hêzên me sivîl topbaran kirine û li gorî nûçeyên dewleta Tirk li hemberî sivîlan êrîşêke bombeyî pêk hatiye.
Li vê herêmê tu tevgera hêzên me nîn e. Yên ku herêmê bê ser û ber topbaran dikin, dewleta Tirk a dagiker û çeteyên wê ne.”