Komeleya HEZKURDî roja 04.03.2021î Îstanbul de Temsîlkarîya PAKî ya Îstanbulî zîyaret kerd.
Mîyanê heyeta HEZKURDî de Serekê Komeleya HEZKURDî Suphi Özgen û Îdarekarê Komele Muzaffer Özer, Gülê Can Ronahî û Giyasettin Abluşak estbî.
Hetkarê Serekê Pêroyî yê PAKî Mehmet Gül û Kasım Ergün û endamê Meclîsa PAKî Mehmet Dörtyama û Seyid Bayram û endamê PAKî Tahsin Uçar ameyî heyeta HEZKURDî vera.
Nameyê heyeta PAKî ser o Kasım Ergünî semedê xebatanê HEZKURDî yê derheqê ziwanê Kurdkî de HEZKURD pîroz kerd û qala pîya xebata heme het û hêz û dezgeh û şexsîyetê ke xebata ziwanê Kurdkî kenê û kampanyaya ke semedê “wa ziwanê Kurdkî bibo ziwanê fermî û bibo ziwanê perwerdeyî” dîyaya dest pêkerd kerd. Kasım Ergünî va ‘’Wa kamcîn dîn û mezhebî ra bê, kamcîn fikir, sîyaset û îdeolojî ra bê, gere her çî ra ver her Kurd na kampanya îmze biko. Gere ma na mesela de yewvengîya miletê Kurdî biresne Dewleta Tirkîya zî, biresne dinya zî. Helbet kamcî şar û miletî ra bê zî, gere ma destegê her merdimî/e zî bigîre. Gere bi tu sebeb, tu kes na kampanya sivik nêko, vera ci de nêvindo’’.
Nameyê heyeta HEZKURDî ser o zî Serekê Komeleya HEZKURDî Suphi Özgenî heyeta PAKî rê spas kerd. Suphi Özgenî zî va ‘Semedê ziwanê Kurdkî kam çi xebate biko ma do hetkarî bidim ci. Sey rayberîya Komeleya HEZKURDî ma bi xo zî na kampanyaya ke tede vajîyeno “wa ziwanê Kurdkî bibo ziwanê fermî û bibo ziwanê perwerdeyî” îmze kerda. Ma PAKê zî semedê xebatanê înan ê derheqê ziwanê Kurdkî de pîroz kenê’’.
Heyeta PAKî û ya HEZKURDî waşt wa dewamîya dîyalog û têkilîya her di hetan û hemkarî û pîya xebate semedê ziwanê Kurdkî mitabiq mendî.
Pêvînayîşê heyeta PAKî û yê HEZKURDî atmosferêko dostane û berhemdar de vîyart.