Hewlêr de nahîyeya Xelîfanî, Koyê Spîlkî de vera yew yewîneyê Pêşmergeyan, hêrişê hewayî yê fuzeyan û wesayîtanê hewayî yê bêmerdiman (ÎHA) ame viraştene.
Hêriş, dorûverê saete 03.00 de qewimîya. Yew çimeyo payeberz Rûdawî rê qisey kerd û wina va: "Hêriş de 6 Pêşmergeyî şehîd bîyî, mabênê 20 heta 25 Pêşmergeyî zî birîndar bîyî."
Çimeyî da zanayene ke, "Hêriş bi fuze û dronan ame kerdene, labelê hûmara înan hema tam nêzanîyêna. Nika derheqê cenazeyanê şehîdan de muameleyê tibê edlîyî yenê kerdene."
Goreyê malumatanê ke ameyê girewtene, hêrişan de tewr tay 5 fuzeyî û dronî ameyî şuxulnayene.
Fermandarîye ra eşkerayîye
Hetê bînî ra Fermandarîya Herêma 1. ya Yewîyanê Pêşmergeyan ewro (Sêşeme) eşkera kerd ke qerargehê Tûmenê 7. bîyo hedefê hêrişê fuzeyan.
Goreyê eşkerayîye, hêrişo yewin şewe saete 01.50 de ameyo meydan. Hêrişo diyin zî saete 02.50 de nezdiyê qerargehê tûmenî, sînorê dewa Kelekînî de reyna bi fuzeyêke ame kerdene.
Nameyê Pêşmergeyanê ke şehîd bîyê wina yê:
- Rêber Ebdullah
- Zekrî Bexşeşî
- Ramîn Adil
- Şehab Bexşeşî
- Keywan Muzafer
- Piştîwan Mela Musa
Şerê Îsraîl û Amerîka
28ê Sibate de dima ke Amerîka û Îsraîlî vera Îranî dest bi şer kerdî ra nat, Herêma Kurdîstanî tewr tay 400 ÎHA û fuzeyan reyde bîye hedef. Nê hêrişanê hewayî de 8 kesan weşîya xo vîndî kerdbî. Nînan ra yewê ci mensubê Asayîşê Hewagehê Mîyanneteweyî yê Hewlêrî, şeşê înan Pêşmergeyê Rojhelatî û yew zî leşkerê Fransa ke Hewlêr de wezîfedar bi.
Vizêr şewe zî, tayê dronî erziyayî Konsolosxaneyê Amerîka yê Hewlêrî û hewagehî zî, labelê nê dronî hetê sîstemanê pawitişê hewayî ra hewa de ameyî îmhakerdiş.