Mêrdîn de zeytûnê Dêrikî asta dinya de bi tamê xo namdar ê. Dêrik de zeytûnêrê hezar serreyî estê. Hesadê zeytûnan dest pêkerd. Cinîyanê kedkaran da zanayene ke hesadê emserînî parî ra zêdêr ê la semedê krîzê ekonomîkî ra kadkarî qerqilîyenê.
Hasîbe Erola ke wayîra baxçeyê zeytûnêran a, îfade kerd ke ê serê sibayî dest pê karî kenê. Hasîbe eşkera kerd ke her serre zeytûnî zêdîyenê û vat: ''Ma serê sibayî 6 de dest pê karî kenê û heta cemê şanî xebitîyenê. Mêrdeyê mi zeytûnêran şano tê ma zî arê danê. Dima ma zeytûnan vîjnenê. Her serre zeytûnê ma roşîyayêne. Emser krîzê ekonomîkî ra zeytûnî destê ma de mendî. Tirkîya zî zeytûnanê xo hînî Sûrîye (Efrîn) ra gêna coka zeytûnê ma zî bîyî ercanêr. Ma nêeşkenê heqê keda xo bigêrê.''
Hasîbe da pare kerd ke rîyê hewayê lêşinî yê Fabrîkaya Madenî yê Şîrketa Etî ra zeytûnê înan zerar vînenê û vat: ''Verî heta wisarî zeytûnêrî ma pirr bîyî, bibereket bîyî. La nika rîyê na fabrîka ra zeytûnê ma cade benê pûç. Qeza de her kes pê naye qisey keno. Nê meseleyî pêro zor danê ma.''