Hêzanê rejîmê Îranî çalakîyanê protestoyî yê vera qetilkerdişê Jîna Emînî de hêrişê şarî kerd û 5 kesî qetil kerdî.
Cinîya kurde Jîna Emînîya (22) ke Rojhelatê Kurdîstanî ra ya, Tehran de hetê polîsanê exlaqî ra semedo ke gijikê ci aseno amebî qetilkerdene. Seba Jîna Emînî hîrê rojî yo Îran û Rojhelatê Kurdîstanî de çalakîyî dewam kenê.
Rêxistina Heqanê Merdiman a Rojhelatê Kurdîstanî Hengawî da zanayene ke çalakîyanê Rojhelatê Kurdîstanî de hêzanê rejîmê Îranî tewr tay 5 kesî qetil kerdê. Goreyê agahîyanê ke Hengawî dayê, Seqiz de 2, Dîwandere de 2 û Dehgulan de zî kesêk ameyî qetilkerdene.
Hetê bînî ra ewro nê hîrê şaristanan û Mehabad, Ûrmîye, Bukan, Sine, Kamyaran, Bicar, Qurwe û Banen de tewr tay 100 kesî birîndar bîyî.
Selahîyetdaranê Îranî derheqê mergan de eşkerayîyêke nêdaye.
Çalakîyanê protestoyî yê Tehran û Meşedî de zî çalakîyanê wendekaranê zanîngehî de vera hukmatî sloganî ameyî vatene. Polîsan pê jop û gazê îsotî hêrişê çalakîkeran kerd û xeylê kesî destbend kerdî.