Bajaranê Sûrîye Hama û Îdlîb de operasyona Rûsya û Rejîmê Sûriye roja xo ya 21’ine de dewam kena.
Qaso ke hukmatê Sûrîye vato, rocawanê bajarê Hema de artêşa Sûrîye aver şîya û rocawanê Lazikiye de zî dewa Kibane ya stratejîk destê tererorîstan ra peyser ameya girewtene.
Heto bîn ra başûrê Idlibî de zî teyarayê Rûsya û helîkopterê artêşa Sûrîye nehîyeya Mearet Hurm û Xanşêxûn danê bombeyan ver û qaso ke vajîyeno nê cayan de xeylê kesê sîvîlê ke tede domanî zî estê amê qetlkerdene.
Welatiyêkê nehîyeya Mearet Hurmî vano “Ma sîvîl ê, ma her roj mîyanê vengê teqayîşan de cuyenê. Qijê ma zaf tersenê. Teyarayê Rûsya pê fuzeyan, helîkopterê hukmatî pê bombeyan derûdorê ma bombarduman kenê.”
Seke zanîyeno bajarê Îdlîbî nika destê terorîstanê EL-NUSRA de yo. Rûsya û Rejîmê Sûrîye qasê aşmîyo ke Îdlîb bombarduman kenê. Bombarduman de heta nika xeylê sîvîlî amê kiştene û hezaran kesî zî cayê xo ra bar kerd.