Encûmena Giştî ya Neteweyên Yekbûyî civînek pêk anî û di civînê de hat eşkerekirin ku ji ber şer û pevçûnên çekdarî hejmara kesên ji cih û warê xwe bûne, gihiştiye 48 milyon kesan.
Raportora Taybet bo Awareyan a Neteweyên Yekbûyî Cecilia Jimenez Damari di civînê de ragihand: “Hejmara kesên ku ji ber pevçûn û tundiya çekdarî li seranserê cîhanê aware bûne, gihişt 48 milyon kesan û ev hejmar heta niha hejmara herî bilind e.”
Cecilia Jimenez Damari diyar kir: “Di vê rewşê de ku pevçûna çekdarî û belavbûna tundiyê tevlihev bûye, pêkanîna rêzgirtina li mafên navdewletî yên mirovî û rêzgirtina li mafên mirovan her ku diçe dijwartir dibe.”
Damari destnîşan kir ku ji ber şer û pevçûnên li piraniya cîhanê û karesatên sirûştî ku xelkê ji cih û warên wan dikin, dibe ku rewşê xirabtir bikin.