Partîya Demokratîk a Şaran (HDP) tayînkerdişê qeyûman ra dima beyanatêk da û va: ‘’Na tena meseleya HDP û Kurdan nîya, meselaya heme şaranê Tirkîya ya. Bêveng memanê, bêvengîye qebûlkerdiş o.’’
Heyetê Rayberdişî yê Merkezê HDP beledîyeyanê Amed, Wan û Mêrdînî rê teayînkerdişê qeyûman ra pey beyanatêk da.
Beyanatê HDP de wina vajîya:
Hemşaredarê ma yê ke Amed de bi se ra 63, Mêrdîn de se ra 56 û Wan de se ra 53 rayan ameyî weçînayîş bi fermanê bêhuqûqî yê Wezîrîya Karanê Zereyî ra wezîfe ra amey girewtene û îradeyê şarî ame xespkerdene. Operasyonê vera endamanê ma yê Meclîsê Şaredarî û xebatkaranê şaredarî dewam keno.
DERBEYA SÎYASÎ YA
Na derbeyêka newe ya sîyasî ya. Hetêk ra zî vera îradeyê şarê Kurdî dişmenetî ya. Wezîrîya Karanê Zereyî bi nê qerarê xespkerdişê heq û azadîyan û îradeyê şarî, fermanê derbe dayo. Demê qeyûmî de nê hîrê şaredarî açarîyayebî enqazan. Bi sebebo ke îqtîdar û Wezîrîya Karanê Zereyî nêwazenê bêhuqûqî û neheqîya ke qeyûman kerdo vejîyo werte, paştî dayê înan. Nika meşruyetê nê îqtîdarî nêmando. Îradeyê şarîyo ke weçînayîş de vejîyo werte bi zext yeno xespkerdene. Şarê ma senî ke cuwa ver zî qebûl nêkerd do ewro ra tepîya zî vera na neheqîye vengê xo berz bikero û wayîr îrede û partîya xo bivejîyo.
Ma veng danê heme şaran û hetanê demokratîkan ê Tirkîya ke wa vera îqtîdaro ke îradeyê şarî nas nêkeno vengê xo berz bikerê. Vera nê îqtîdarî şuxulnayîşê heme rayîranê mucadeleyî yê demokratîk û meşrûyan heqêko bingeyên o. Na tena meseleya HDP û Kurdan nîya, meselaya heme şaranê Tirkîya ya. Bêveng memanê, bêvengîye qebûlkerdiş o.’’