Hemserekê Komeleya Cigêrayîşanê Kurdan Eyub Subaşiyî va, “Ganî pêro lehçeyê Kurdkî bêrê pawitene. Her ziwan wayîrê potansîyelê averşîyayîşî yo la ganî statuya ziwanî zî bibo.”
Hemserekê Komeleya Cigêrayîşanê Kurdan Eyub Subaşîyî va, “Kurdkî ziwanêko zaf qedîm o. Ma eşkenê Kurdkîyî birasnê heta Avestayî. Her lehçeya Kurdkî wayîra potansîyelî ya. Kurdkî heta ewro bêstatu eşkaya pay ra bimana.”
Hetê 50 mîlyon însanî ra yena qiseykerdiş
Subaşi malûmatanê xo de va, “50 mîlyon însan Kurdkî qisey keno. Kurdîstan de, Kafkasya de, Ewrûpa de, heta Çînî de zî dewê Kurdan estê. Kurdîstan tarîx de bîyo wareyê xeylê medenîyetan coka tarîxê û ziwanê kurdan zaf qedîm ê.”
Ganî statuya ziwanî bibo
Ey va, “Kurdkî raştê asîmîlasyonêkî xidarî yena. Ziwano ke mebo wayîrê statu û pê perwerde meyero dayîş aver de nêşino. Pî û mayî zî domananê xo de qisey nêkenê û ziwan neqlê nivşa newî nêbeno. Bakurê Kurdîstanî de Kurmanckî û Kirmanckî yene qiseykerdiş. Kirmackî ma vînenê ke xeylê têpîya menda. Ma ganî pêro lehçeyanê Kurdkî têduşt bivînê û înan bipawê. Ma bi wesîleyê Roja Ziwanî Zeytînburnû, Esenyûrt û Sultanbeylî de do panelan organîze bikerê. Ma do 21ê Sibate de forûman bivirazê. Nê forûman de ma do dersanê alfabeya Kurdkî zî bidê.”
MA/