Serekkomarê Fransa Emmanûel Macron seba ke krîzê mabênê DYA û Îranî kemî bibo do serekê DYA Donald Trumpî, serekkomarê Îranî Hasan Rûhanî û serekê dewleta Rûsya Vladîmîr Pûtînî dir pêvînayîşan bikero.
Emmanûel Macron zîyaretîya Belgradî ya paytextê Sirbistanî de beyanat da û va ke, seba pawitişê peymana nukleere û qedînayîşê têmîyanbîyayîşê herême do Trump, Rûhanî û Pûtînî dir bêro yew ca.
Serekkomarê Fransa vat: “Nê teşebusê ma, cografyaya Ewropa de ziwanêko newe awan kerdo û Amerîkayijan dir rayîrê ver bi dîyalogêkê bisebirî akerdo.”
Macronî va: “Nê şertanê zehmetan de ma do qasidî û muzakerekarîya xo bidomnê. Gama ez agêraya Fransa sere de ez Rûhanîyî dir qisey bikerî. Dima ra ez do no hewte Pûtîn û Trumpî dir zî qisey bikerî.”
Macron îzeh kerd ke, o seba ke alozîya herême vindarno, na xebate keno.
DYA Gulana 2018’î de xo peymana nukleerî ra antibi. Tehran zî welatanê Ewropa rê zextan keno ke mueyîdeyanê DAY pûç kerê û sozê xo bica bîyarê. Tehranî tewr peynî de eşkera kerdibi ke înan nisbetê zengînkerdişê ûranyûmî veto serê 3.67’î.
Îdareyê Tehranî wazeno ekonomîya Îranî zextanê DYA ra bipawo û naye ra zî zextanê xo kena vêşî. Roja Dişemeyî Wezaretê Karanê Teberî veng da îmzakaranê welatanê Ewropa ke wa tedbîranê pratîkan, bitesîran bigêrê û bi mesuldarî tê bigêrê.