Şaristanê Strasbourgî yê Fransa de Yasemîne Çetîndaga çewlîgije 23ê kanûne ra nata vînbîyaye bî. Dima ke keyeyê aye muracatê polîsan kerd eşkera bi ke Yasemîne hetê babîyê domananê ci ra ameya qetilkerdene.
Şaristanê Strasbourgî yê Fransa de Yasemîne Çetîndag (25)a ke 23ê kanûne ra nata vînbîyaye bîye, hetê Savaş Ozyanikî (42) ra kişîyaye. Dîya zanayene ke Yasemîne û Ozyanik heta 2 mengî verî pîya ciwîyayêne.
Babî Azad Çetîndago ke çewlîgij o vat: ''No mêrik û kênaya m 8 serran ra nata pîya ciwîyayêne, 4 domanê înan estbî. La kênaya mi nê wextanê peyênan de hînî nêwaştêne pa ey biciwîya. 23ê kanûne de nê mêrikî verê çimanê domanan de dayo kênaya mi ro û dima zî xeniqnaya. Dima ey û embazêkê ci cenazaya kênaya mi daristan de kenê binê erdî. Ez nika Çewlîg de ya. La ma her roje kênaya xo de qisey kerdêne. Dima ke ma nêeşkê xo biresnê aye ma kiştoxî rê telefon kerd la ey vato Yasemîne nêdîyo. Dima ma muracatê polîsan kerd. Torna min a pîle zî pîrika xo rê qala serebûtî kerda. Dima 28ê kanûne de polîsan cenazaya kênaya mi dîya.''
Polîsan eşkera kerd ke kiştox Ozyanik tepişîya û erşawîya zîndanî. Polîsan da zanayene ke keso ke hetkarîya Ozyanikî kerde qeçaxçî yo û 11 sûcan ra zaf reyî tepişîyayo.