Expression Interrupted raporê gulane-hezîrane pare kerd. Goreyê raporî 2 aşman de 109 rojnamegerî ameyî muhakemekerdene û 4 rojnamegeran rê cezaya zîndanî ya 9 serran û 8 aşman dîya.
Expression Interrupted raporê 'Rojdemê Azadîya Îfade û Çapemenîye' yê gulane-hezîrane pare kerd.
Rapor de tedaya vera çapemenîye ya Tirkîya cayêko girîng girewt. Rapor de ame vatiş ke Tirkîya de 2 aşman de hûmara rojnamegeranê tepişteyan resaya 65.
Rapor de dîya zanayîş ke aşmanê gulane û hezîrane de 109 rojnamegerî ameyî muhakemekerdene, 4 rojnamegeran rê cezaya zîndanî ya 9 serran û 8 mengan dîya, derheqê 6 rojnamegeran de tehqîqat dîya destpêkerdene û 3 rojnamegerî ameyî destbendkerdene.
Rapor de ame parekerdene ke çalakî û nawnayîşan de şîdetê polîsanê Tirkîya yê vera rojnamegeran zêdîya. Rapor de kişîyayîşê Denîze Poyraz, betalkerdişê Peymana Îstanbulî, îtîrafê Sedat Pekerî yê serê Suleyman Soylu û Mehmet Agarî zî ca gênê.