Piştî vegera ji serdana Fransayê, Recep Tayyip Erdogan bal kişand ser biryara Amerîkayê ya xelatkirina dîtina cihê sê serkirdeyên PKKê û got: “Baweriya me bi biryara Amerîkayê nayê, 20 sal e ev pirs berdewam e. Civaka navdewletî jî êdî ji vê mijarê bêzar e.”
Bi gotina Erdogan meseleya PKKê tenê girêdayî Qendîlê nîne û amaje bi hebûna PKKê li nav kampa Mexmûrê kir û got: “Pirs ne tenê bi Qendîlê ve girêdayî ye. Kampa Mexmûrê jî di rojevê de ye. Wek tê zanîn di vê kampê de 12-13 hezar kes dijîn. Ev kamp bûye hêlînek bo PKKê. Neteweyên Yekbûyî hewl didin vê kampê bigrin.”
Erdogan got: “Eger Neteweyên Yekbûyî Kampa Mexmûr bigirin, çi diqewime? Wek tê zanîn hikûmeta navendî, parlamento û serokomarê Iraqê hatin hilbijartin û pêkhateya wan bidawî bû. Em dest bi diyalogeke baş dikin. Herwiha rasterast ligel hikûmeta navendî, Amerîka, Hevpeymaniya Navdewletî û hikûmeta herêma bakurê Iraqê peywendiyan dideynin, danûstandinê dikin bo bidawîanîna hebûna PKKê li Iraqê û karê hevbeş dikin.”
Erdogan da zanîn, ku ew bi taybetî ligel Amerîkayê piştî wê biryarê, derbarê Qendîlê de jêrxaneke maqûl diafirînin û di hemû waran de kar li ser dikin.