Merkezê Xeberan- Engîn Eroglûyo ke dewa Şorşwenkî ya Pulurî ya Dêrsimî aşma hezîrane de gama ke heywanê xo çerênayêne bibi vînî û 19 rojan ra dima meyîtê ey Torûnobaya qezaya Pulurî de amebi dîyene, mergê ci ra ramitoxê otobuse sey sucdar ame dîyene.
15ê hezîrane de Qezaya Pulurî ya Dêrsimî de Engîn Eroglû wexto ke heywanî xo çerênayêne otobuse dabi piro û kewtibi Çemê Munzurî û vîndî bibi. Cigêrayîşanê 19 rojan ra dima meyîtê Engîn Eroglûyî amebi dîyene. Tehqîqatê dawaya hema zî dewam keno.
Çarçewa tehqiqatî de gore raporê Dezgehê Tipa Edlî ramitoxê otobuse E.S. se ra 100 sey sucdar ame dîyene. Zanayîş hetê Serekê Baroyê Dêrsimî Kenan Çetoyî ra ame parekerdene. Çetînî îfade kerd ke reyna ame qetîkerdene ke Ergîn Eroglû rîyê pirodayîşê otobuse ra merd û ê do biwazê ke ramitoxê otobuse bêro tepiştene.