Vizêr çekdarê ke Efrîn de şarê Kurdî rê zulum kenê yew vîdyo vila kerdbî û vîdyo de çekdaran kurdêk rê îşkence kerdêne.
Vizêr çekdarê ke Efrîn de şarê Kurdî rê zulum kenê yew vîdyo vila kerdbî û vîdyo de çekdaran kurdêk rê îşkence kerdêne. Çekdaran vîdyo de welatîyê Kurd Reşîd Hemîd Xelîlî ra waştêne wa keyeyê xo ra pere biwazo û eke pere nêdîyê ê do ey bikiştê.
Ewro aşkera bi ke çeteyê ke dest ronayê Efrînî ser o welatîyo Kurd Reşîd Hemîd Xelîl qetl kerdo. Tirmê Reşîd Hemîd Xelîlo ke bi îşkence ame qetlkerdiş, qezaya Efrînî Şêra, mabênê dewanê Qestel Cindo û Erebwêran de ame vînayene.
Welatîyo Kurd Reşîd Hemîd Xelîl û lajê ey o 9 serrî Mihemed Xelîl û welatiyêko bîn Şerefedîn Sîdo 9 rojî verî hetê çekdarê ke seba hukmatê Tirkîya Efrîn de xebitîyenê ra ameybî remnayîş. Hema aqûbetê Şerefedîn Sîdo û domano 9 serrî Mihemed Xelîlî kifş nîyo.
Seke yeno zanayîş bajarê Kurdan Efrîn 18ê Adara 2018î ra destê artêşa Tirkiya û çekdaranê OSOyî de yo. Ê wextî ra nat hezaran welatîyê Kurd bi destê çekdaran amê remnayîş, tayê xo amê kiştene, tayê xo îşkence dî û tayê xo erdê xo ser o koç kerd. En peynî zî welatîyê Kurd Reşîd Hemîd Xelîlî bi destê çeteyan bi rojan rastê îşkence ame û peynî de ame qetlkerdene.