Merkezê Xeberan - Efrîn de zulmê çekdaran dewam keno. Çekdarê ke dewleta Tirkîya desteg dana ci, dewekêa Efrînî de muxdarê dewe û 2 dewijî remnayî.
Gorê xebera Televîzyona K24î grûba çekdare ya El Hemzatî dewa qezaya Mabada Şorbe de muxdarê dewe Reşîd Muslim Omer û 2 dewijî Hesen Ehmed Bêrem û Idrîs Seydo Cafer remnayî.
Çekdarî milet remnenê û keyeyanê înan ra pere wazenê. Eke pere bêro dayîş êsîran veradanê, la eke nêro dayîş êsîran bi îşkence kişenê.
Nê çekdarî girêdayîyê hukmatê Tirkîya yê û hetê Tirkîya ra yenê weykerdiş.
Artêşa Tirkîya nê çekdaran de pîya 22ê Çeleyê 2018î de Efrînî rê operasyone dabî dest pêkerdiş û Artêşa Tirkîya 18 Adare de kewtbî mîyanê Efrînî. Na operasyone ver hezaran keyeyî Efrînî ra koç kerdbî. Çekdarê ke girêdayîyê Tirkîya yê Efrîn de heta nika malê şarî talan kerd, semedê fîdye milet remna û seyan kesî bi îşkence qetl kerdî.