Edhem Barzanîyî Serekîya Herêma Kurdîstanî, Iraq, Neteweyanê Yewbîyayeyan, partîyanê sîyasîyan û rêxistinanê komelê sivîlan rê mektubêk erşawit û waşt wa verê îşxalî pê yewîye bêro girewtiş.
Endamê Heyetê Îdareyî yê PDKyî Edhem Barzanîyî derheqê îşxalê dewleta tirke de Serekîya Herêma Kurdîstanî, Iraq, Neteweyanê Yewbîyayeyan, partîyanê sîyasîyan û rêxistinanê komelê sivîlî rê mektubêka erşawit.
Edhem Barzanîyî mektubê xo de vat ke, Kurdîstan kewto verê pêlêkê bînî yê îşxalê artêşa tirke û wêrankerdişê xoza. Barzanîyî îfade kerd ke artêşa tirke erdê Başûrê Kurdîstanî de qasê 40 kîlometreyan aver şîya û hemwelatîyê Behdînanî herême ra bêçarîye ra hê koç kenê.
Barzanîyî mektub de îzah kerd ke, daristanê Başûrî bi hawayêko sîstematîk hetê artêşa tirke ra yenê vêşnayîş. Barzanîyî vat: ''Ez venga îqtîdar û pêro terefanê mesuldaran dana ke se kenê wa bikerê la verê na teda û îşxalî bigîrê. Sey tecrubeyê verênî eke dewleta tirke cayêk de ca biba hînî tira nêvejîyena. Îsbatê ney o tewr gandar zî Qibris û Îskenderîye yo. Wextê ci ameyo ke ma pîya bi hawayêkê neteweyî vera îşxalî tewirêkî bimojnê.''