Bajarê Duhokê yê Herêma Kurdistanê û bajarekî Amerîka bûn destexûşkên hev.
Duh bi merasîmeke online, bajarê Duhokê yê Başûrê Kurdistanê û bajarê Gainesville li eyaleta Florida ya Amerîkayê, bûn destexûşkên hev.
Bi amadebûna Parêzgarê Duhokê Elî Teter û Serokê Şaredariya Gainesville Lauren Poe, merasîmek birêve çû û peymana destexûşkatiyê di navbera her du bajaran de hat îmzekirin.
Parêzgarê Duhokê Elî Teter derbarê wê peymanê de ji Kurdistan24ê re ragihand: “Destexûşkatiya Duhokê û Gainesville ji bo wê yekê ye ku alîkarî û hemahengî di warên aborî, geştyarî, akademîk, kulturî, çandinî, pîşesazî û çendîn warên din de di navbera her du bajaran de werin bihêzkirin.”
Elî Teter diyar kir: “Zanîngeha Floridayê zanîngeheke bi nav û deng a Amerîkayê ye û em kêfxweş in ku zanîngehên Duhokê bikarin hemahengiya zanistî ligel wê zanîngehê pêk bînin û bi vî awayî bêhtir sûdê ji peymanê werbigrin.”
Bajarê Gainesville li eyaleta Floridayê ye û Zanîngeha Floridayê jî bi qada xwe ya 8,2 kîlometre çargoşe, him ji aliyê hejmara xwendekaran û him jî ji aliyê mezinbûnê ve, yek ji mezintirîn zanîngehên Amerîkayê ye.