Dewêka Azarpêrtî de seba ke înternet nêanceno 50 wendekarî her roje serdê zimistanî de qasê 2 kîlometreyan rayîrî ra şinê û vejîyenê serê koyan.
Dewa Çêrmeyê Karêrî ya qezaya Azarpêrtî ya Çewlîgî de seba ke înternet nêanceno wendekarî heqê perwerdeyî ra mehrum manenê. Tewr tay 50 wendekarî her roje qasê 2 kîlometreyan rayîrî ra şinê û vejîyenê serê koyan.
Dewijî wazenê ke îstasyonê bazî yo ke se ra 90ê ci virazîyabi wa cade xizmet bido.
Muxtarê dewe Nurettîn Tuzî ke medyaya cayîyî rê qisey kerd wina qala mesele kerde: ''Seba ke îstasyonê bazî virazîyo serra 2017 de xebatî dîyayî destpêkerdene û se ra 90ê bazî ame kerdene. Vajîyeno ke ganî têna hacetêk îstasyonî rê lazim o. 4 serrî vîyartî la îstasyon hema aktîf nîyo.''
Tuzî da zanayene ke seba ke bazê 50 metreyînî de roşnî çîn a seba teyarayan zî tehluke yo. Tuzî waşt ke cade meseleyê wendekaran bêrê çareserkerdene.
Tuzî vat: ''Bi taybetî prosesê pandemî de wendekarî binê şert û mercanê zimistanî de neçare manenê ke vejîyê koyan ser.''