Domanê dewa Şîlbeyî ya Dîyarbekirî awa pîse de asnawe kenê.
Dewa Şilbeyî girêdayîya merkeze dîyarbekirî ya. Na dewe dewêka komkerdî ya. Şarê na dewe ekserî Pîran ra yo. Dewe de hem Kurmancî estê hem zî Kirmancî. Heta dewe de mehlayê Kurmanc û Kirmancan estê. Binê dewa Şilbeyî ra dereyêk vîyareno. No dere verê cû zelal û pak bîyo. La serranê peyênan de awa kanalîzasyonî bena mîyan û awa dereyi bena pîse.
‘Germ o, coka ma kewenê na awa pîse’
Domanê na dewe na awa pîse de asnawe kenê. Nê domanan ra yew vano, “Ma zî zanê na awe pîs a la zaf germ o, coka ma kewenê na awa pîse. Pîlê ma vanê verê cû na awe pake bîya û tede maseyî bîyê. La nika gemarin a û maseyî zî nêmendê. Ma zengîn nîyê ke şorê bikewê hewzanê taybeta. Dewa ma de hewzêk bibîyêne, ma nêkewtêne na awa pîse.”
‘Ma wazenê dewa ma de hewzêk bêra viraştiş’
Yewna domanî va, “Ma wazenê dewa ma de hewzêk bêra viraştiş. Par domanêk awa qanalî de xeniqîya. Hewza ma biba, ma do bi ewlehîye asnawe bikerê. Ma do seba viraştişê hewze domananê dewe mîyan ra îmzayan arê bidê. Dima ma do şorê beledîye û cayanê bînan û seba hewze muracaatê nê cayan bikerê.” Eke na meseleye nêra safîkerdiş, domanî do xo bierzê taluke û nêweş bikewê.